Rvwang Shansher kàru bok bøn ráì tvrà angdong ku shá dvzvr we
Nvmlat Wál
Rvwàng Kàru mvnlvm dvzaqshi yàng we
Rvwangrì nø kàru màdá mvme dvciq mvme lvpat vl yvngshà. Wedø kàru màdáì nìgø shìgung móng taq wa vl dvgvp nø pà dvréshìlvm màvl yvng. Iwe 1910 nøng dvgvp English pè nø Rvwang móng svng tuq ráì nø øpróng poqshi yà:ngì. Kàru rø sháò vsvng gvzà màvl rvt vsuya kèní kàru tuq ra kvt nø vní vshøm shigùng vlé nìgø kàru rø sháò gø yvng svng vjirì vjèr nø rø dvzvr yà:ngà. Wedvgvp kèní wa kàru cvnshi ràe, wa we nøt shaqrérì taq zvng pvngshi lú:ngì. Vrúm nìgø myo rvgaq svng dvzá:rò nø kàru cvnshilvm nònggùn zí yà:ngà. Paqzí zùng taq cvnshì bøì yvng kèní Myen kàru, English kàru, Jinghpaw kàru shã vsvng vl lú:ngì. Zùngcè werì nø angpè angmè maq svng vdè kàí shvri kàru vrü mvyø nìgø Rvwang kàru màvl rvt vdè pvn kàru mvn ràe, wa dvdvm vshat yà:ngì. Wemvdò taq kèní nvmlat pèní nø Du Konglang Pung, nvng svra Pungzí Umsvr ní íe. Sishal kàru wa pvn kèní mvn yà:ngà. Iwe shvngbeí lvng shvla høq màshvbøn yà:ngò. Mèpvng 1942 nøng dvgvp wunji pè Du Zvrtaq Søní Roma kàru chvng kení Rvwang kàru mvn vløt yà:ngà. Wepoq nø Ø chvng màbá rvt wa íe, køm dø ni mvn yà:ngà. Wedø Rvwàng kàru mvn dvzaqshirì vl yà:ngì nigø kàru angbok wá mvlún yà:ngò. 1945 nøng taq missionary J. Russel Morse rvp tuq ráì nø Konglvngpø taq vl yà:ngì. Angcè pè Robert Morse nø mòngkà dvshvng sórí Konglangpø, Wuning rvwá tuq rái ke Vshaq Ráwang Bezií svra Robert svng, "Nàí shèngø:tnò we Gvray tvrà nø Rvwangrì svng Lisu kàí pàwá shèngøtshàe? Nøngmaqí mvcí:ngì. Rvwang kà ecvnshi nø Rvwang kàí shèngøtshà. Rvwang kàru gø èwáashà," wa røt yàngà. Vrá, 1949 nøng dvgvp Nokmung wamà svng tuq rái. Wekvt Dong-øp Gushen Pung, Vji Gvru Pung, zùng svra Konglvng Pung maq nvng vhøm yà:ngì. Wepoq taq gø vshaq werìí Robert Morse kaq svng Rvwàng kàru èmvnashà, wa røt yà:ngà. Robert Morse gø, shvlae, wá vløtlvm íe, I we Rvwangrì shvngbe nøt vrá màrá we røtlvm Kristmas bóy svng ekøm ránøng kvt shvla mvcha vrashàì, wa vtvnshi yà:ngì.
1949 nøng December shvlá taq KonglvngPø yvng Kristmas boy svng køm we noqshi we nvng mvnoqshi we shaqré shaqtvng shvngbeí Rvwàng kàru wáalvm røt we kàru vrü yà:ngà. Kàru wegøm taq yadø vrü yà:ngà, "Nøngmaq Rvwàng dvcìrì nø Rvmèti tìbo tut kèní pvng kaq, Lvbí, Langse høq, Moløm, Lizang, Dvmang, Pvngrìn, Tinøng tì kupa yapa, Nvmløp làm kaq Sumbrabum, Putao, mvchangboq, Nokmung høq, Nvmsvr lam kaq Miwa móng Salawin rvmè høq à:lìe. Vrúm vsar we shìgùng móng í rvt nvmsvr nvmløp tìbo tìni vl we paqzi sha vsangí gø mèrøn kèí. Wervt paqzí màshá nemàn vdòngø vl yvngshà. I nìgø dèni Gvray jejú rvt Sasvna svrarì ètuq ráshà nø Gvray mòngkà tá lún bøshà yvngkèní Pvlàcè vne gvr lóngshà. Paqzi tvrà vjú svng yvng lún bñshà. Gvray mòngkà gø kàru kèní røshi rà pvn í rvtnø nøngmaq Rvwàng dvcì gø vdè kàru taq Gvray mòngkà cvnshi lvlú:nì dø Rvwàng kàru èmvnashà. Rvwàng kàru èmvnashà gø nø nøngmaq Rvwàng pvn dvpvt tiq dvciq Sasvna leqínøng, wàìe". wa vrüòe.
Wekvt kàru welòng nø svra gvbà Robert Morse svng tiq gøm svra gvbà J.C. Morrison svng tiq gøm zí yà:ngà. Angmaq dvhø taq vrashi nø Rvwang kàru nø svra gvbà Robert Morseí mvnalvm, Shansher kàru gø língalvm vrá yà:ngì. Wervt mvme nøng dvzaqshi yvng kèní Rvwàng kàru mvn dvng yà:ngà we íe. 1951 nøng taq Gvnøng Rvwang Lega, wa we Rødvmvn tiq bok shvlvt bøà yvng kèní Rvwang cèri vdòng taq vdè kàru røsháò vsvng vl pvngshiá:mì. We mèpvng nøng 1952 nøng kení Rvwàng kà taq Shànshér Kàru líng pvng yà:ngà. Ráwàngtvng, Mvzètaq rvwá taq nvmlat língò nø, Kàgvp Angshvr Marko bok líng yà:ngà. Ya dvhø taq svra Robert Morse gø paqzi cvnshi nvng USA kaq vtvng nø døngku gø shvzøngshi nø mvme tiq dvgvp vsar yàngì.
Shànshér Kàru líng bvnlì taq vbá yà:ngì rì
Dr. Robert H. Morse vtvng ràì nø Putao Dukdang wamà taq vlrà gø shvzøngshi nø wekvt kení wa Rvwang kàru bvnli tøpwa dvzaqshi yàngì. Wedvgvp kàru lí:ngò yvngø kà dang taq dvbvngshì yà:ngì we nø, Svra Ráwàng Bezi Dø nvng angnvm pè Ráwàng Søn í yà:ngì. We poq taq Dvzvr, Luka, Yohan nvng Shvrikàru cvm bokla tiqmaq nø Dukdang mvrìng taq líng yà:ngà. We mèpvng dvbvngshì yà:ngì we svrarì nø Svra Mvgàltaq Piter, Svra Nvnghø Timona, Svra Ráwàng Bézi Dø maq í yà:ngì. Kàgvp angshvr bok nø Svra gvbà Robertní zømwàng rvgaqgaq lí:ngò nø Thai móng Chiangmai wamà taq dvdá:ngò dá:ngí 1972 nøng taq dip yà:ngà. Rvtø 20 nøng tøm yà:ngì.
1978 nøng dvgvp kèní Kàgvp Anglí bok nvmlat líng pà:ngò nø líng bvnli taq Dr. Robert svng dvbvngshi yà:ngì we nø, svra gvbà Yintvng Piter nvng Svra Tøngkang Søndvng ní íe. Nvmpvng Nvmlat bok nvng Kàdvtutshú kàru cvm bokla wa líng dvng bøà mèpvng Svra gvbà Robert kaq Rvwang kà dang dvbvngshú màvl rvt tiq nøngla narò nø svra Jimmy Dachinvm nvng svra Yt. Pilemon maqí wà yàngà we Shvring Zaywà bok tiq dvgvp dvcøp vdvng we mvngmán kvrú we wà yà:ngà. 1981 nøng taq svra Mvná Andrew svng Shansher kàru bvnlì taq dvbvngshilvm dvzvr daqà. Ang gø shvring zàywà bok dvlà vrvng we taq tvngdvng dvbvngshi yà:ngì. Svra David Morseí lvngbungò nø Hongkong yvng dip dvng Rangoon svng shvri yàngà.
Wekvt rá Kàgvp angli bok líng bvnlì pvnglvm dvdamò dvgvp Dr. Robert nø American móng kaq 2 nøng lo ràá:mì rvt Chiangmai taq vl we Rvwang shansher kàru gomidi mvdò vrashi nø Shansher Kàru Kàgvp Anglí bok líng mvza maq líng dvdvnglvm bvnli nø Dr. Vwiqwang Jerry nvng Svra Mvná Andrew ní svng bvnli shvri yà:ngà. Angníí Bungám bok kèní Ezekiel bok høq 25 bok nø 2 nøng vdòng taq líng dvng yà:ngà. Jvk taq kvrúshú nø svra Mvniq Vguq, svra sinwal Yosep, svra mè Redvmwang Kono, svra mè Kodvng Nvng maq tvliq tvle dvzaqshi yà:ngì. Wekvt svra gvbà Robert gø lo ráì nø, Kàgvp Anglí nvng Kàgvp Angshvr shvngbe gøtdvhøm dvcøp we bvnli nø Dr. Robert Morse, Dr. Jerry Vwiqwang, Svra Tøngkang Parmina, maq wáshì yà:ngì. Computer jvk taq Rvwang Shanshér Kàru diplvm dvgøò we nø Svra Redvmwang Yaku íe. Wepoq dvcøp bøàri Computer taq dip bvnli nø Svra Redvmwang Yaku, svra Mvná Andrew, svramè Redvmwang Kono maq dvzaqshi yà:ngì. Angbok dvlà vrvnga we nø Svra David Morse í yà:ngì. Yadø mvme gø dvzaqshi yvng kèní Rvwàng Shanshér Kàru Kàgvp Anglí nvng Angshvr nvmlat poq dip yvngshà we nø Bangkok wama taq 1985 August shvlá taq íe. 5,000 bok dip yvngshà. Yapoq Kàgvp anglí wa líng we 13 nøng tøm yà:ngì. Mànar zvn dvtut líng we møí. Yuqyà dø wa língò we í rvt Kàgvp angli nvng angshvr líng bvnli nø 33 nøng tøm yà:ngì.
Shànshér Kàru bokkøp vrá dvcøp we bvnlì
Mèpvng Wál
Yabok Shanshér Kàru lvng vrávmshà we vnícé rvzé nøng mèpvng vrá tiq poq dvcøp we bvnli wá rà rvtnø dvcøp bvnlì wà bøà. Shanshér kàru bokkøp vrá dvcøp we bvnlì nø 2002 nøng dvgvp kèní pvng yà:ngà. Dvcøp bvnli taq nø Men móng Rvwang Shansher Kàru Komiti kèní lvngbü:ngò nø dvcøp pvng yà:ngà. Dvcøp bvnlì taq vbá yà:ngìrì nø, Kristu shvngømré kèní svra Ráwàng Bezi Dø, Svra Mvkømgang Yosep, Svra Mvgàltaq Piter, Svra Svløptaq Yonatan, Svra Yintvng Pilemon, Svra Tøngkang Parmina, Svra Dvbe Yohan, Svra Nvnghø Pilip, maq íe. Tiløp shvngømré kèní Svra Biset Kangsar, Svra Dvngraq Pung, Svra Mvlong Ingram, maq íe. AG shvngømré kèní Svra Sangdong Koli, Svra Dvkøm David, Svra Chán Sønsvr, Svra Chán Vbé, Svra Tishøl Pijung, Svra Chán Pungsvr, Svra Chvngmør Zing, nvng Svra Yøntvng Jungshín maq í yà:ngì. Angmaq nø rvtð døp dvkømshì mvlú:nò rvt 3, 4 nøng ram vmuq tiq shvle rø dvcøp yà:ngà.
Yamvdòí rø dvcøp bøà mèpvng Kàgvp Anglí nvng Angshvr bokkøp svng vrá tvngdvng bvnli tvnùnglvm rvt angké komidi mvdòí bvnli apdaqà dø tiq dvchá, Chiang Mai wamà taq Svra gvbà Mvgaltaq Piter, Dr. Jerry Awiqwang nvng Svra Mvná Andrew maqí tiq poq rø dvtøp bøà. Yapoq computer jvk taq kvrúshú nø mè Waqdvm Zvmi nvng pè Vwiqwang Rvmzing wáshìe. Wedø dip bøò rì kaq Dr. Vwiqwang Jerry nø American móng taq vl dvgvp a:ngí tiq poq rø dvtøp bøà. Yabaq nø Shanshér Kàru nvmlat vrü yà:ngà we angké kà Hebru, Aramik nvng Greek kà taq shvbú:ngò nø dvcøp bøà. Kà laqyà nvng lvjøm dang gø tøptøpwa dvcøp lún bøà. Nvmlat poq taq lvng yà:ngà kàrì gø tiqmaq líng bøà we vle. Kàgvp Angshvr bok nø Svra Mvná Andrew nvng Dr. Vwiqwang Jerry níí wa vrá tiq poq dvcøp bøà. Svra Mvbøq Yøn, svra Sinwal Yosep, svra mè Mvbøq Chvng maq gø rø dvtøp dvbvngshi bøì. Svra Mvná Andrew nø Shanshér Kàru bokkøp dvcøp dvbvngshi mvdvmø computer taq gø tvngdvng dvcøp dvzaqshi bøì. Yapoq computer taq angbok dvlà vrvnga we nø Svra No. Yiliye íe. Rvgaq hang rì dvgøò nø Photo shop taq zá:ngò we nø Svra Mvná Andrew nvng Svra Ngwá Api íe. Bvnlì yarì lvngdøm dvtvng wàlvm rvt computer jvkrì nvng bvnlì wárà dvgøa nø shvngbe taq yvng dvbvng we nø Svra David Morse íe. Yadvng gø nø nøt lømløm dvzaqshi bøì rvt angmaq shvngbe svng oqà waìe. Yapoq nø Miwa móng Nanjing wamà taq dip dvng bøà nø nvmlat bok vto lú:nì we nø 2009 nøng November shvlá 7 ni taq vto lú:nìe. Yapoq dvcøp bvnli wàò we rvtø nø 7 nøng dvngte tøm bøì. Rvtø døp wa wàì we nø 4 nøng ram íe. Shvngbe 15,000 bok dip bøshà.
Dip dvpø gvmsung lá we dang
Yapoq Shansher Kàru diplvm gvmsung nø gvzà yvk we dvhø kení Gvrayí dvgøò rvt dip lúnbøshà we íe. Svra gvbà Jerry gø svra Mvná Anderu nø kàru bvnlì taq wa rvtø døp ngøpshi rvtnø gvmsung lá mvlú:nò. I we Gvray kaq vjú røt dvng kukaq yakaq vra bøshà ke svra sinwal Døram gø yadø ràì we kà táò weó zvng wa ang gø Shanshér kàru líng bvnli taq dvbvngshi mvlú:nò nøng gø vdè dvcì dvpvt, Gvray dvpvt í we nø dip dvpø lá we taq dvbvng lún dvngte dvzaqshilvm laqí. Vju røt dvng shvngømré rì kaq website taq kení shá dvzá:rì, wa ráì. Wervt Rvwang shvngømré tvrà nvng shansher kàru kadø zøm dà:ngì tvrà website taq zvng bøshà. Wekvt Singapore shvngømrérì lap kení tékaq dèbvng bøshà. Minmóng shvngømré rì kení gø gvzà dvzaqshi nø vlu zvng bøà. Svra gvbà Jerry, Yosep, Andrew maqí gø email rì taq kà dvkang bøà ke, vní kaq kèní 3,4 shvlá vdòng taq dip dvpø luqhøq vto lún bøshà. Wervt svra Sinwal Døram nvng Singapore shvngømré rì kaq gø American móng Mark Translation mvdò svng gø gvzà oqà, wàìe. Gvray ìshøt nø namaq gø vrvm mvdvm laq tuq daqé.
Rvwang Shansher kàru bok tvrà angdung ku dvtan we ya dvngte taq nar vdue. Pamvrà.
Mvná Min
(Ngà computer taq lvngò we RW font long taq bvnchvt vl nø v, ø, taq shaq zvng màshvlã, mèmezønga shànié
written by Mvna Min on September 23, 2011 at 6:30am
Shá mvyørì dvpvt zvngshi we íe. Tiq shvlá mèpvng nø delete wàlvm íe.)
from kagabuce hxmra
No comments:
Post a Comment